Minggu, 09 Oktober 2011

(Pojok Lambe) : Alun-Alun Malang


Alun-alun aslie wis onok molai jaman mbiyen, utamane nang Jowo. Enggone mesti nang tengah-tengah pemukiman lan dadi pusat gae kumpule warga. Pas jaman Hindu-Buddha, alun-alun fungsine yo dadi panggonan ibadah gae muja utamane dewi pari, terus pas jamane Wali Songo yo dadi pusate nyebarno agama Islam. Alun-alun yo pas jaman Mataram dadi pusat latian gae prajurit-prajurite.

 

Nah, alun-alun iki rek mesti onok enggen ibadah koyok mesjid, terus pusat pemerintahan ambek pusat ekonomi koyok pasar dadi kabeh warga mesti nglumpuk tumplek blek nang alun-alun pas wayahe rame. Terus ciri liyane yoiku onok wit-wit ringin nang pojok-pojoke alun-alun ambek lemah alus. Embuh opo maksude sing jelas alun-alun iku koyok plaza nok jamane Romawi Kuno dadi enggon kumpule wong sak ndeso utowo sak kota.

Ngene-ngene aku dadi kelingan alun-alun Malang. Aslie onok loro, yoiku alun-alun Malang Kucecwara sing diarani Alun-Alun Bunder, ambek alun-alun kota dhewe. Nah, nok alun-alun kota iki wis onok molai jaman Londho. Aku lali mbiyen arane opo, jelase fungsine podo ae, dadi enggon cangkrukan, dodolan, lan sak panunggale. Unike nok alun-alun Malang iki sakliyane Mesjid Jamik yo onok Grejone..siji Grejo Protestan GPIB Immanuel, lha sing rodok adoh tekok alun-alun iki onok maneh Grejo Katolik Bunda Hati Kudus. Telu-telune dibangun pas jaman Londho. Nok tengahe onok banyu mancur (air mancur) sing gak mben dino diuripno. Pas aku sik cilik, meh mben malem Minggu mesti digowo wongtuwekku nang alun-alun, biasa..dulinan ambek ndelok banyu mancur sing lek diuripno apik banget opo maneh lek pas lampune murup.

Pas Pasar Gede kobongan akhir 80an, wong-wong pasar dodolane nok pinggir embong. Molai tekok Pasar Gede iku malah ngantek alun-alun, sampek alun-alune sumpek akeh bedak sing nggarai pas iku akeh korak (preman), dadi pas jaman iku mlaku nang alun-alun opo maneh bengi gak aman blas. Iku terus-terusan sampek taun 1998 pas Pemkot Malang ngresiki alun-alun tekok bedak liar ambek poro korak sing ngresahno warga pas iku. Operasi gede-gedean molai alun-alun sampek batese Pasar Gede iku sempat dilawan ambek poro korak iko, ngantek bolak-balik onok inciman terror, tapi ujug-ujuge yo akhire alun-alun isok diresiki tekok bedak liar ambek korak iku.

Molai taun 1998 iku sampek saiki Alun-Alun Malang tambah apik. Gae nambah daya tarike, dipasang bekupon gae panggonane doro-doro dadi wong-wong sakliyane cangkrukan yo isok ambek makani doro-doro sing jumlae tambah suwi tambah akeh. Wong dodolan yo pancet onok, tapi modele asongan lan gak netep dadi gak patheko ngrusuhi koyok ndhisik-ndhisik. Tandurane yo tambah gembel masiyo kadang pas mongso ketigo sukete ketok soklat-soklat. Pendekane alun-alun iki sakliyane dadi tetengere kota ambek pusat kegiatan polae strategis yo nduwe fungsi liyo dadi paru-parune kota, nambah ayune daerah iku. Wit-witan ringine yo nggembel dadi Mbak Kunti ambek memedi liyane tambah betah (hahahahah).

Jelase alun-alun Malang kudu tetep dilestarekno. Polahe iku wis dadi aset lan yok opo carane kudu tetep dipertahano gae anak putu mene-mene.


Kamuse
Korak  : preman
Bedak (e-ne diwoco koyok becak, diwoco bedaq) : lapak, kios
Inciman : anceman
Bekupon : pagupon, rumah burung dara
Molai : wiwit, awit, mulai, sejak
Pancet : tetep, tetap
Iko : kae, itu (jauh)
Embong : dalan, rattan, jalan
Mene : sesuk
Gembel (e diwoco koyok lemah) : lebat



6 komentar: