Minggu, 18 September 2011

(Pojok Lambe) : Endi Ae Se Daerah Arekan Iku?


Arek lek nok boso kulonan ngaranine bocah. Iku biasa digae nyeluk koncone nang konteks sing akrab ambek guyub. Lek sampeyan gae nang wong tuwek yo iso-iso ditabok. Daerah Arekan iki yo aran gae wilayah Jawa Timur sing budaya ambek coro omonge rodhok seje ambek coro omonge wong Jawa Tengah ambek wong Jawa Timur Mataraman. Nah, sak jane lek tekok geopolitik ambek budayane, propinsi Jawa Timur iki kebagi dadi koyok ngene



1.    Daerah Mataraman (molai tekok batese Jawa Tengah sampek bates kulone Kali Brantas nang wilayah Kertosono, Nganjuk ambek Blitar, tapi yo nang wilayah-wilayah segoro kidule Malang sampek Banyuwangi akeh sing buyut-buyute tekok Mataraman).
2.    Ponoragan
3.    Pantura (Tuban, Bojonegoro, Lamongan)
4.    Arekan
5.    Pendalungan
6.    Medhuro
7.    Bawean
8.    Banyuwangen
9.    Tengger

Nah, daerah sing diarani Arekan iki molai tekok daerah etane Kali Brantas. Nyebrang tekok Kertosono terus mlebu Jombang sampek daerah bates etane nang perbatasan Probolinggo ambek Lumajang. Nah, daerah sing coro tradisine dilebokno nang Arekan iku antarane :

1.    Gresik
2.    Suroboyo
3.    Sidoarjo
4.    Jombang
5.    Mojokerto (ambek kota Mojokerto)
6.    Pasuruan (ambek kota Pasuruan), lan
7.    Malang (plus kota Malang ambek kota Batu)

Daerah arekan iki ndhuwe logat boso ambek watek sing rodo seje ambek dhulur-dhulure nang Jowo liyane. Wong Arekan diarani omonge kasar, terus koyok wong ate gelut, uakeh-akehane nggae nada dhuwur lek ngomong dadi kesane ndhek pandengane wong kulonan koyok gak ndhuwe unggah-ungguh ambek toto kromo. Tapi sakjane wong etanan iku ndhuwe watek sing blak-blakan, gak seneng basa-basi, terus ambek ngomong sak onoke gak kathik boso kembang-kembang. Sing paling dadi tengerane barang yo seni budaya koyok Ludruk, Wayang Jawa Timuran, Tari Ngremo, ambek Tari Beskalan Putri.

Sakliyane iku daerah Arekan iki yo dadi jantung perekonomiane Jawa Timur, soale ibukotane manggon nok Suroboyo, gurung maneh industri-industri akeh nglumpuke nang daerah Arekan. Nah, sing dadi pusat industri iku antarane Mojokerto, Sidoarjo, Gresik ambek Pasuruan. Terus pusat pendidikan agama koyok ponpes-ponpes bersejarah mangkale nang Jombang. Nah, Malang Raya dadi pusate agrobisnis, agrowisata ambek pusat pendidikan sing didadekno jujugane gak mek wong Jawa Timur tapi yo sampek sak Indonesia malah monco.

Daerah Arekan iki barang yo dadi daerah campuran lek tekok geopolitik. Opo’o? Lek daerah Mataraman iku diarani daerah abang, terus Meduro ambek Tapal Kuda diarani daerah ijo, lha daerah Arekan iki malah dadi daerah campur aduk. Abang onok, ijo onok, kuning onok sampek biru yo onok. Yo wis ngerti dhewe lah werno-werno iku tekok partai opo.

Nah, daerah Arekan iki itungane klebu daerah songgoane Jawa Timur soale mayoritas industri nglumpuk nang daerah iki, dadi potensine gak iso dianggep sepele. Nah, boso etanan barang yo diangkat pisan nok JTV ambek pirang TV lokal. Misale nang Pojok Kampung sing disiarno mben jam songo bengi iku yo nggae boso Suroboyoan, tapi jane yo 11-12 ambek boso Malangan, Jombangan, Mojokertoan, Nggresikan ambek liyane. Cumak sing luwih enak yo nggae istilah boso Etanan iku rek, sing kudu dilestarekno soale iku dadi tenger-tengeran arek Jawa Timur utamane sing tekok daerah tengahan.
Pojok Lambe
18 September 2011

1 komentar:

  1. Asal mula Arek berasal ketika jaman Kerajaan Singosari-Majapahit. Pada saat berdirinya Kerajaan Singosari-Malang dan Ken Arok sebagai Rajanya, ada peruntukan khusus untuk nama Arek yg berarti adalah -keturunan-. Arok memiliki arti Dewa/Tuhan sedangkan Arek berarti “Anak/Anak-dari” (Arti Ken sendiri selain memiliki banyak arti juga kental dgn makna “teritorial”). Ini adalah bentuk pembeda dari wilayah “Bocah-an” dan “Arek-an” yg mana ditambah lagi ketika jaman kebesaran Kerajaan Majapahit daerah “Bocah” adalah merupakan wilayah “Arek” tapi tidaklah sebaliknya.

    Nah, praktis jika melihat Kota Surabaya adalah kota para pendatang, dimana semua daerah berdatangan dan berkumpul; dan soal “Arek” ini adalah wujud dari keunggulan/yg-diunggulkan serta pengaruh kuat dari leluhur di jaman dulu. Wajar jika Surabaya mengamini sebutan Arek, yg mana Arek Surabaya sejatinya adalah para garis keturuanan Arek Malang asli sebagai rantau. Kalaupun ada rivalitas itu sangat dimaklumi, justru inilah bentuk dari kuatnya kontak batin antara saudara yg sebenarnya seperti hilang ingatan.

    Pelajari dan amati sejarahnya, barulah kita tarik dari Malang ke Surabaya. Karena tidak dapat dipungkiri bahwa Surabaya merupakan daerah suksesor dan pewaris genetik ke-khusus-an Malang secara tidak terlihat.

    “Bukan untuk perbedaan tapi janganlah disamakan”.

    BalasHapus